台語文創作者許正勳是濱海地帶七股人，他早期擔任國中英語老師及國內外台語師資培訓班講師等，曾榮獲多屆文學獎項肯定，著有《園丁心橋》、《放妳單飛》、《鹿耳門的風》及《烏面舞者》等多本台語詩集、散文集。新書《往事一幕一幕》是其二十年完整的心情紀錄，立意樸實，文字精煉，共分為地景、至親、黃昏、囝仔時、鹽鄉、人物、詠物、環保及心情、雜記等十輯，作者回顧一生的路，有甘有苦，一幕一幕，感觸良多，化為一首一首真誠的台語詩篇。

許正勳
1946年出世，台南市鹽分地帶七股區大潭寮人。輔仁大學德文系出業，政治大學教育研究所結業。捌做過國中英語老師、北北基、桃竹苗、中市、南市、雲嘉南、高高屏、花東、美國北加州台灣語文學校聯合會、行政院僑委會等海內外台語師資培訓班講師。捌著過南瀛文學新人獎、府城文學獎作品集正獎、南瀛文學獎現代詩優等獎。作品有散文集《園丁心橋》《放妳單飛》，政論集《不是新聞》，台語詩集《阮若看著三輦車》《鹿耳門的風》《城市三寶》《孤鳥》《往事一幕一幕》，台語散文集《烏面舞者》《愛河夜遊想當年》。

推薦序 序正勳老師詩集《往事一幕一幕》
文/ 許長謨（國立成功大學中文系教授-退）

佮許正勳熟似，是佇二十年前教育部拄好佇咧推捒「九年一貫」鄉土母語教育的時陣。有兩擺收著正勳老師的詩集，真是欽佩。當時會曉用台語文寫作的人真是罕見，閣有法度合輯詩歌成冊，一定有伊真正的詩心佮才情。三不五時仔欣賞伊的詩作，不時仔會看著細密的情懷。也感受著這位詩人滿滿的悲憫佮對親人的愛。
這一擺，《往事一幕一幕》完整記錄著正勳老師二十年來較完整的心情紀錄。咧欲出版的詩集，這是台南市文化局對伊長期以來筆耕，對故鄉、對文化堅持的肯定佮鼓勵，也是正勳老師為家己做了人生回顧的完整紀錄。當伊電話中希望我會當為伊寫一篇序文，我當然非常的願意，一方面是榮幸，一方面也樂意借這本詩集的良善真情，為逐家紹介這位詩人這份純情佮悲憫情懷。
寫詩無像寫散文仝款，會當直接講真濟心內話，好佳哉正勳老師的文字精煉，立意樸實而純良，斟酌看也會當看出真事件佮好性情。對(uì)伊詩的鑑賞中，也會當理解這二十年來，而個人、而家庭、而社會、而台灣、而國際的真濟變化，攏一一記存佇伊詩集中。
這本詩集，收入了跨越二十年光陰的故事，佮人生的遭遇，詩人用體貼的分類，替讀者鋪排整理這段光陰的故事，成長、經歷佮情感發受……就如同詩集《往事一幕一幕》的名稱仝款，這本詩集目錄所記的內容總共十輯，也拄拄好是正勳老師對自己性命的回顧佮感受：
第一輯〈地景〉的表象，親像佇描寫台灣幾个名勝地景，卻是伊佇南部──尤其是台南、高雄，是詩人性命中上重要的深情背景；第二輯〈至親〉到第三輯〈黃昏〉是規本詩集中，上蓋纏綿的親情流露，正勳老師對家人，尤其是珍愛一生的牽手，上深切的情感紀錄。懷久病而西歸，遺憾無法彌補，借著無奈的多情文字，此恨綿綿無絕期，文字無論長或者短，攏予人動容！
第四輯〈囡仔時〉一方面做回憶，一方面做童年的文化生活的題材。第五輯的〈鹽鄉〉、第六輯的〈人物〉，是詩人對仝時陣做伙成長的歷史佮人物互動的紀錄，這輯中有袂少故事佮紀錄難得佮珍貴，會使做台灣史傳記的補充資料；第七輯〈詠物〉、第八輯〈環保〉、第九輯〈心情〉佮第十輯〈雜記〉，會當做前六輯的枝葉佮花蕊，有系統刻畫了真濟詩人文學之日常，長綿綿的性命感受。
整體來看，這也算是一部「詩史」，範圍可能無蓋闊、時間可能無蓋長，但卻是確確實實記錄了台灣近三十年來現代台語文學發展，一个條理清楚佮性命確實的實例題材。正勳老師運用伊精準的台文語詞、樸實的經歷、溫柔的感受，一步一跤印分享予咱，伊一个豐富完整，性命的故事。